सिद्धार्थ ग्रंथालय व माहितीशास्त्र महाविद्यालयात पदवीदान समारंभ उत्साहात संपन्न

बदलत्या काळात AI व आधुनिक तंत्रज्ञान आत्मसात करा: मान्यवरांचे विद्यार्थ्यांना आवाहन

छत्रपती संभाजीनगर |विशेष प्रतिनिधी

येथील डॉ. बाबासाहेब आंबेडकर मराठवाडा विद्यापीठ संलग्नित सिद्धार्थ ग्रंथालय व माहितीशास्त्र महाविद्यालय (मिटमिटा) येथे नुकताच वार्षिक पदवीदान समारंभ अत्यंत दिमाखदार आणि उत्साही वातावरणात पार पडला. या सोहळ्यात अनेक नवनवीन पदवीधरांना सनद प्रदान करून त्यांच्या भावी वाटचालीस शुभेच्छा देण्यात आल्या.

कार्यक्रमाच्या अध्यक्षस्थानी महाविद्यालयाचे प्राचार्य डॉ. मनोहर वानखडे होते. तर प्रमुख पाहुणे म्हणून पदवीधर आमदार मा. सतीश चव्हाण उपस्थित होते. व्यासपीठावर प्रमुख वक्ते प्रा. डॉ. सय्यद अझरुद्दीन, डॉ. प्रसाद मदन, प्रा. प्रदीप रोडे, श्री. रखमाजी जाधव आणि महाविद्यालयाचे संचालक प्रा. सुनील मगरे आदी मान्यवरांची उपस्थिती होती.

कार्यक्रमाची सुरुवात मान्यवरांच्या हस्ते दीपप्रज्वलनाने झाली. त्यानंतर उपस्थितांचे स्वागत करण्यात आले.

पदवीचा उपयोग समाजहितासाठी व्हावा: आमदार सतीश चव्हाण

मार्गदर्शन करताना आमदार सतीश चव्हाण यांनी सांगितले की, “विद्यार्थ्यांनी कष्टपूर्वक मिळवलेल्या पदवीचा उपयोग केवळ स्वतःच्या उज्ज्वल करिअरसाठी न करता समाजहितासाठी देखील केला पाहिजे. शिक्षणातूनच समाजाचा आणि देशाचा विकास शक्य आहे.”

AI आणि संशोधनाचे महत्त्व

प्रमुख वक्ते प्रा. डॉ. सय्यद अझरुद्दीन यांनी आपल्या भाषणात कृत्रिम बुद्धिमत्ता (AI), माहिती तंत्रज्ञान, संशोधन आणि उद्योजकतेच्या वाढत्या महत्त्वावर प्रकाश टाकला. “सातत्याने ज्ञान मिळवणे, प्रामाणिकपणा, शिस्त आणि कठोर परिश्रम हीच खऱ्या यशाची गुरुकिल्ली आहे,” असे प्रतिपादन त्यांनी केले. डॉ. प्रसाद मदन व प्रा. प्रदीप रोडे यांनीही विद्यार्थ्यांना बदलत्या काळाशी जुळवून घेण्याचा मोलाचा सल्ला दिला.

बाबासाहेबांचा संदेश स्मरणात ठेवा: प्राचार्य डॉ. मनोहर वानखडे

आपल्या अध्यक्षीय भाषणात प्राचार्य डॉ. मनोहर वानखडे म्हणाले की, “ही पदवी म्हणजे विद्यार्थ्यांच्या संघर्ष, परिश्रम आणि यशाचे प्रतीक आहे. आजच्या आधुनिक युगात तंत्रज्ञान आत्मसात करतानाच भारतरत्न डॉ. बाबासाहेब आंबेडकर यांच्या ‘शिका, संघटित व्हा आणि संघर्ष करा’ या प्रेरणदायी संदेशाचे तंतोतंत पालन करून जीवनात नेहमी पुढे जात राहा.”

उत्साही वातावरण अन् पालकांची उपस्थिती

या सोहळ्यास संस्थेचे सचिव इंजि. साहील मगरे, इंजि. सौरव मगरे, उपप्राचार्य शीलवंत गोपनारायण, महाविद्यालयातील सर्व प्राध्यापक, शिक्षकेतर कर्मचारी, नवपदवीधर विद्यार्थी आणि त्यांचे पालक मोठ्या संख्येने उपस्थित होते.