अधिकारी व कार्यकर्त्यांच्या उपस्थितीमध्ये जेसीबीने पाडले काम; उद्याच्या आंदोलनाच्या पार्श्वभूमीवर प्रशासनाची तातडीने कारवाई
छत्रपती संभाजीनगर (विशेष प्रतिनिधी):
डॉ. बाबासाहेब आंबेडकर मराठवाडा विद्यापीठातील आंबेडकरी चळवळीचे प्रेरणास्थान व अस्मितेचे केंद्र असलेल्या ‘नामांतर शहीद स्मारकाचे’ निकृष्ट दर्जाचे बांधकाम अखेर आंबेडकरवादी संघटनांच्या तीव्र आक्रोशामुळे प्रशासनाला पाडावे लागले आहे. सार्वजनिक बांधकाम विभागाच्या वरिष्ठ अधिकाऱ्यांनी उपस्थित राहून जेसीबीच्या साहाय्याने हे निकृष्ट बांधकाम पाडण्यास सुरुवात केली.
नेमके काय घडले?
दिनांक २२ जुलै रोजी विद्यापीठ परिसरातील नामांतर शहीद स्मारकाचे सुरू असलेले काम निकृष्ट दर्जाचे असल्याचे आंबेडकरवादी संघटनांनी उघडकीस आणले होते. या प्रकारामुळे आंबेडकरी समाजात प्रचंड संताप निर्माण झाला होता. सर्वपक्षीय आंबेडकरवादी संघटना व ‘आंबेडकरवादी बहुजन विकास समिती’च्या वतीने सार्वजनिक बांधकाम विभाग आणि शासनाला तीव्र आंदोलनाचा इशारा देण्यात आला होता.
उद्या पुकारण्यात आलेल्या आंदोलनाच्या पार्श्वभूमीवर परिस्थितीचे गांभीर्य ओळखून, आज सकाळीच सार्वजनिक बांधकाम विभागाचे अधीक्षक अभियंता एस. एस. भगत, कार्यकारी अभियंता शेषराव चव्हाण आणि उपअभियंता ढाकणे यांनी घटनास्थळी धाव घेतली. संघटनांच्या प्रतिनिधींना सोबत घेऊन सकाळीच जेसीबीच्या साहाय्याने निकृष्ट ठरलेले बांधकाम पाडण्यास सुरुवात करण्यात आली.
“शहीदांचा हा लढा रक्ताच्या शेवटच्या थेंबापर्यंत लढू!”
“नामांतर लढ्यातील शहीदांचे बलिदान आम्ही कधीही व्यर्थ जाऊ देणार नाही. आंबेडकरी चळवळ संपल्याचे भासवणाऱ्या मनुवाद्यांनी आमच्या सामाजिक अस्मितेवर घाला घालण्याचा प्रयत्न केल्यास त्यांना तीव्र आणि सडेतोड उत्तर दिले जाईल.”
— दीपक निकाळजे (अध्यक्ष, आंबेडकरवादी बहुजन विकास समिती)
पावसातही कार्यकर्त्यांचा ठिय्या व जोरदार घोषणाबाजी
सकाळी जेसीबीने बांधकाम पाडण्यास सुरुवात होताच उपस्थित कार्यकर्त्यांनी महापुरुषांच्या आणि नामांतर शहीदांच्या नावाने गगनभेदी घोषणाबाजी करत परिसर दुमदुमून टाकला. पाऊस आणि प्रतिकूल हवामानाची पर्वा न करता, जोपर्यंत निकृष्ट बांधकाम पूर्णतः पाडले जात नाही, तोपर्यंत कार्यकर्त्यांनी घटनास्थळी ठिय्या मांडला होता.
प्रमुख उपस्थितांची नोंद
या कारवाईच्या वेळी आंबेडकरवादी बहुजन विकास समितीचे अध्यक्ष दीपक निकाळजे, प्रांतीय नेते प्रांतोष वाघमारे, अमित वाहूळ, राहुल वडमारे, सचिन निकम, नागेश केदारे, मिलिंद दाभाडे, जयश्री शिरके, पवन पवार, कपिल बनकर, सोनू नरवडे, संतोष चव्हाण, शुभम मगरे, कृष्णा शरणागत, राष्ट्रपाल गवई, राजकुमार कांबळे यांच्यासह मोठ्या संख्येने पदाधिकारी, कार्यकर्ते आणि सार्वजनिक बांधकाम विभागाचे अधिकारी-कर्मचारी उपस्थित होते.
